Kan kawmthlang te

Thlasik khaw vawt vín túk a reh chho a, nipui thli a thaw tan a, khaw nawm lai tak ani. Ruahthimpui sur atang ni tam ala liam lo. Boruak khu leh paw a reh a, boruak chu a thiang kak mai. Lung leng mi tan pawh lunglén zual hun tur ang kha ;) Zing dar 1 vel a ni a, kan veng chu a reh leh em em tawh. Lehkha zir àwm ang tak in ka pindan ah chuan ka in zam hnawk ve niai a, amaherawhchu lam hla a ka thian, rei tak ka biak tawh loh nen chanchin in hrilh in phone chu ka sik deuh reng.

Kan kawmthlang footpath ah hian mipa rual hi an 'spot' ni àwm tak a ni, an tawng deuh lúng lúng. Ka hmelhriat pawh an ni hlawm lo (in ka hria). Mi engzat tak nge an nih ka hre theilo na in panga ai an tlem lo ang, an thawm that danah. Zan rei lam ani tawh si, an thawm chu a ring tha viau. An titi chu ka ngaithla chàk tlat pek. Ka tukverh in kalh thlap tawh chu ka va hawng zau ta deuh.

Chelsea inkhelh zan anih hmel pakhat sawi hmangin. An inhnial deuh bap bap zel, inkhelh thiam tak an ni hlawm, an insawi danin. An thlit belh zel ni tur ani, an thusawi a nawi chho ta riau. Nawi ti ila thu an khuh lo sàwt. Dàwt a tlem tial tial. A rorum sàwt khawp mai a, ka lo nui leh tet tet thin. Chutia an infiam bawrh bawrh karah chuan pakhat hian,

"Ka call dawn, ka call dawn hi ni tawp bawiha min dang miah suh."

"I ruih em kha a hre leh anga, buaina tam mai mai"

"Ka text tal ang, ka ngai em ani. A tello hi chuan ka tello bawiha."

"A tul miahlo aw, a phone kha laksak teh u" 

"Pasal keimah ai tha. Bawiha, pasal tha deuh a nei tawh." 

A tap titih ta mai. 

An thawm chu a zawi ta deuh na chungin an han inthlem vel laih laih pawh chu kum upa beng fing tan chuan a la ring mah maithei. Ka rilru ka kàwm zui ta daih. Ka bengkhawn zui ta vaklo. Tlangval (ni ngei turah ka ngai) thusawi chuan thil tam tak min ngaihtuah tir roh!

A thil tawn chu ka hriatthiampui hauhlo na in a nat zia erawh ka hritlang àwmna tho chhuak peihlo ai a nép chuangin ka ringlo. A rilru nú bet but karah pawh a hmangaih chu a theihnghilh lo va, a ngai em em mai a, biak ringawt pawh a chak ngawih ngawih chu a ni lawi si a.

Heihian a lantir a ka hriat chu khawvelah hian engmah réng hi kumhlun tur a awmlo tih lam daih zu ni pek a! Kan hmangaih tak ten min kalsan a, kan na a, kan tap thin. Kan taksa piah lamah kan thinlung tih natin a awm a. Nat hreawmzia hrechiangtu te khan midang thinlung kan hliam leh fo ang lawi a. Chu chu mihring zia ani. Mahni kan inhmangaih aia nasa a midang hmangaih hi harsa kan ti tlang aniang e. Pathian erawh a danglam tlat. Pathian hi alo van tha tak aw ka ti thin. Min kalsan ve ngai lo va, min tina ngailo. Min lainat in kan na te min tuam damsak zawk fo. Mihring a kan innghah chuan a tawp chu beidawnna te, lungngaihna te, hlawhchhamna te, tahna te mai ani leh thin. Lal Isua kan belh tlat hi a lo van pawimawh tak. Isua chawlhna anih zia leh a rintlak zia ka hre thar leh ta.

An la ri léng lúng na in zan a rei tak ém avang chuan ka tukverh khar fel in mut zai ka rél san ta zawk a.